30 ივნისი, 2008

პირველად საქართველოში საზაფხულო სკოლა სამართალმცოდნეობაში

2008 წლის 30 ივნისს ქ. ბათუმში საქართველოს საკონსტიტუციო სასამართლოში საზეიმოდ გაიხსნა საზაფხულო სკოლა (კურსები) კონსტიტუციურ და ადამიანის უფლებათა სამართალში.

საზაფხულო სკოლა საქართველოში პირველად იმართება და მისი მიზანია ახალბედა იურისტების პროფესიული უნარ–ჩვევების და ცოდნის დონის ამაღლება კონსტიტუციურ და ადამიანის უფლებათა სამართალში.

საზაფხულო კურსს გაივლიან საქართველოს უმაღლესი სასწავლებლების სამართალმცოდნეობის ფაკულტეტების სტუდენტები და ახალბედა იურისტები, რომლებიც კონკურსის წესით შეირჩნენ.

კურსის მონაწილეებს 2 კვირის განმავლობაში ლექციებს წაუკითხავენ შესაბამის დარგებში აღიარებული საერთაშორისო და ქართველი ექსპერტები და საქართველოს საკონსტიტუციო და უზენაესი სასამართლოების მოსამართლეები.

საზაფხულო სკოლის წარმატებული კურსდამთავრებულები სტაჟირებას გაივლიან საქართველოს საკონსტიტუციო სასამართლოში.

საქართველოს საკონსტიტუციო სასამართლო საზაფხულო სკოლას აწყობს ბრიტანეთის საბჭოს, ევრაზიის პარტნიორობის ფონდის, ამერიკის იურისტთა ასოციაციის (ABA), არასამთავრობო ორგანიზაცია "ALPE”–ს, ილია ჭავჭავაძის სახელობის უნივერსიტეტის და თავისუფლების ინსტიტუტის მხარდაჭერით.